勒勒網(wǎng)浪向看到張“福利面包公司第一支店”個(gè)老照片，一記頭心里一拎：“迭個(gè)勿就是哈爾濱嘛！”

“哈爾濱食品廠”，曾經(jīng)是上海邪氣有名個(gè)一家俄式食品廠，1937年，山東人楊冠林開(kāi)勒法租界霞飛路浪個(gè)。當(dāng)時(shí)叫“福利面包房”，生產(chǎn)銷售各種俄羅斯蛋糕、面包、餅干咾啥，勒上海灘做出了大名氣。據(jù)說(shuō)，楊冠林年輕辰光曾經(jīng)勒哈爾濱搭仔海參威一帶個(gè)俄國(guó)人食品店里打工，學(xué)著一手做面包個(gè)好本事。伊是上世紀(jì)三十年代中期，跟牢“白俄潮”到上海來(lái)個(gè)，伊最終選擇勒霞飛路開(kāi)了家小店，門面只有一開(kāi)間，自產(chǎn)自銷俄式面包搭仔其他西點(diǎn)。

“福利面包房”是前店后工場(chǎng)，面包西點(diǎn)儕是現(xiàn)做現(xiàn)賣，新鮮好吃，既保持了俄式傳統(tǒng)工藝特點(diǎn)，又適合上海人個(gè)口味，所以就馬上形成了自家個(gè)獨(dú)特風(fēng)格。幾年之后，“福利面包房”發(fā)展成為有六開(kāi)間門面?zhèn)€大店，改名叫“福利面包公司”，最興旺個(gè)辰光，勒霞飛路浪開(kāi)出了三家門市部?，F(xiàn)在，我看到個(gè)迭張老照片是第一門市部，地址應(yīng)該是現(xiàn)在個(gè)淮海中路919號(hào)，靠近陜西南路。

幾十年斗轉(zhuǎn)星移。一番大變動(dòng)之后，從“福利面包公司”、“哈爾濱面包廠”，最后改名叫“哈爾濱食品廠”了，門市部呢，也只剩下來(lái)淮海中路919號(hào)一家了。但是，伊個(gè)名氣還勒海。小辰光蕩淮海路，走過(guò)此地就會(huì)聞到一陣陣奶油香味。臨馬路個(gè)櫥窗里，擺滿各式各樣個(gè)面包、蛋糕、巧克力搭仔各種糖果，叫人眼花繚亂，饞吐水嗒嗒渧呀。一直到乃，屋里有人過(guò)生日，要買奶油蛋糕，首選個(gè)，還是“哈爾濱”。

可惜，也勿曉得是哪能搞個(gè)，“哈爾濱”現(xiàn)在竟然慢慢叫萎縮了。從前門庭若市個(gè)鬧熱場(chǎng)景看勿見(jiàn)了。講起來(lái)，淮海路浪還有兩只門市部，但是店面儕小得來(lái)是“慘不忍睹”。有一日，我搭太太想著要吃“哈爾濱”個(gè)起司條搭仔核桃排，兩家頭勒淮海路浪尋仔半半六十日，再發(fā)現(xiàn)有家門市部居然縮到了“長(zhǎng)春食品商店”里向去了！

“哈爾濱”個(gè)面包西點(diǎn)，吃起來(lái)倒還是老味道，但是“哈爾濱”個(gè)故事，“哈爾濱”個(gè)鬧猛，只不過(guò)是留勒一眼老年人記憶里個(gè)往事了。